Gleno, 26-07-2024—Diretór-Jerál SEI, Sr. Armando da Costa, akompaña husi Diretora Nasionál Polítika Igualdade Jéneru, Sra. Celeste Ramos Martins Gonçalves hamutuk ho Diretór Interinu Estabelesimentu Prizionál Gleno, Sr. Jose A. da Costa hala’o enseramentu Formasaun Kontrola Hahalok Hirus ba Prizioneiru/a sira iha Prizaun Gleno Munisípiu Ermera.

Sekretaria Estadu ba Igualdade (SEI) liuhusi Diresaun Nasionál Polítika Igualdade Jéneru hala’o ona Formasaun kona-ba Kontrola Hahalok Hirus ba Prizioneiru/a sira hamutuk ema nain Tolunulu Resein-lima (35) durante loron lima iiha Prizaun Gleno Munisípiu Ermera.

Iha sesaun dahuluk Reprezentante husi Formandu/a sira, Sr. Silveiro de Deus Pinto hato’o katak, iha biban ida-ne’e hodi Formandu hamutuk ema nain Tolu nulu resin-lima (35) nia naran hakarak hato’o agradese wa'in ba SEI ne’ebé halo kooperasaun servisu ho Ministériu Justisa liuhusi Diretór Prizionál Gleno no Ekipa Formadór/ora sira hotu husi SEI ne’ebé mak realiza Formasaun ida-ne’e hodi lori ona informasaun lubuk ida mai fahe mai ami prizioneiru/a iha Prizaun Gleno, no formasaun ida-ne’e di'ak no importante tebes mai ami iha fatin ida-ne’e no matéria sira ne’ebé ami simu mak hanesan, Kontrola hahalok hirus, no liuhusi formasaun ida-ne’e ami bele hatene rona no respeita ema seluk no ida-ne’e mak hanesan bukae ida mai ami hodi bele motiva ami hodi transforma ami-nia hahalok sira ne’ebé mak ladi'ak iha tempu pasadu bele transforma ba di’ak, ho nune’e wainhira ami sai husi fatin ida-ne’e no fila fali ba komunidade ami bele fahe tutan fila fali ba ami-nia família no sosiedade sira kona-ba saida mak ami aprende no rona ona iha ne’e, hanesan lema ida husi Prizaun Bekora nian hateten katak, Mai ho Dignidade Fila ho Kualidade.

Iha fatin hanesan Xefe-Departamentu Estabelesementu Prizinionál Gleno, Sr. Jose A. da Costa hato’o agradese wa'in ba SEI ne’ebé realiza ona formasaun Kontrola Hahalok Hirus ba Komunidade Prizioneirus sira iha Prizaun Gleno. Formasaun ida-ne’e bele ajuda ona Formandu sira hodi bele iha kuñesimentu kona-ba kontrola hahalok hirus hodi nune’e wainhira sira fila fali ba komunidade sira bele iha ona maneira ne’ebé sira aprende iha ne’e hodi bele muda sira-nia hahalok hodi bele sai di'ak liután, nune’e mós husu ba SEI atu bele fó mós formasaun ba Guarda Prizioneiru/a sira atu nune’e Guarda sira mós bele iha maneira ba atendimentu ne’ebé dignu, di'ak, tuir regra interna prizionál nian atu nune’e trata ema no kuida ema ho maneira Direitus Umanus nian.

Atu ensera formasaun ne'e Diretór-Jerál SEI, Sr. Armando da Costa iha nia intervensaun informa, “Los duni katak, ita-nia futuru dalaruma ita lahatene no dalaruma mós ita espera ita atu ba para iha ne’ebé, maibe iha ita-nai moris, ita-nia futuru ita bele planu mós maibé ho formasaun ida-ne’e bele lori ba ita hotu ita bele planu ita-nia futuru husi fatin ida-ne’e ba fali moris ida ne’ebé sei tuir mai tanba ita-nia Estadu la adopta buat ida ne’ebé katak ita-boot sira sei permanente iha fatin ida-ne’e. Ho nune’e períodu ida-ne’e hanesan períodu tranzisaun, balun lalais, balun kleur oituan maibé sei integra, sei fila fali ba ita-nian família, komunidade no sosiedade, no husi ida-ne’e, futuru ida ne’ebé ita la espera ita bele planu, ho formasaun sira ne’e ita bele planu katak ba oin ne’e ha'u atu ba ne’ebé” DG-SEI dehan.

Ikuslui, DG-SEI, Diretora Diretora DNPIG-SEI no Xefe Departamentu Estabelesimentu Prizionál Gleno, fahe mós sertifikadu ba formandu sira hodi apresia sira-nia partisipasaun iha formasaun loron lima ne'e.

#Média SEI#