Díli, 31 Jullu 2024____ Sua Exelénsia Sekretária Estadu ba Igualdade (SEI), Sra. Elvina Sousa Carvalho, Ohin loron 31 fulan-jullu partisipa iha Sorumutuk Konsellu Ministrus nian iha palásiu Governu,Díli.

Sorumutuk Konsellu Ministrus ohin lidera diretamente husi Sua Exelénsia Primeiru-Ministru Maun Boot Kay Rala Xanana Gusmão ho rezultadu mak hanesan Konsellu Ministrus delibera hodi aprova Akordu Kontribuisaun Finanseira entre Repúblika Demokrátika Timor-Leste no Ajénsia Japaun ba Kooperasaun Internasionál (JICA-sigla Inglés) kona-ba Projetu Rekualifikasaun Ospitál Nasionál Guido Valadares, ne’ebé sei asina husi Sua Exelénsia Ministra Finansas, Sra. Santina José Rodrigues F. Viegas Cardoso.

Iha okaziaun hanesan Konsellu Ministrus aprova mós projetu Dekretu-Lei, ne’ebé aprezenta husi Sua Exelénsia Ministru Transportes no Komunikasoins, Sr. Miguel Marques Gonçalves Manetelu, ba alterasaun dahuluk ba Dekretu-Lei n. 15/2012, loron 28 fulan-marsu, kona-ba regulamentasaun ba setór telekomunikasoins.

Objetivu ba alterasaun proposta sira-ne’e mak atu klarifika dispozisaun sira ne’ebé eziste, hodi simplifika prosesu lisensiamentu no garante transparénsia ida ne’ebé boot-liu iha operasaun sira ne’e. Diploma ne’ebé revee ona propoin mós medida sira hodi hadi’a efisiénsia iha resposta ba solisitasaun informasaun no hodi garante katak taxa no kontribuisaun sira hetan regulamentu ho adekuadu, atu nune’e hametin konkorrénsia no klareza iha merkadu telekomunikasaun nian.

Ikusliu, Konsellu Ministrus aprova projetu Rezolusaun Governu ne’ebé aprezenta husi Sua Exelénsia Ministru Justisa, Sr. Sérgio de Jesus Fernandes da Costa Hornai, ne’ebé autoriza akizisaun imovel sira ne’ebé pertense ba partikulár, liuhosi direitu privadu, nune’e mós pagamentu ba presu sira ne’e iha korrespondénsia.

Rezolusaun Governu ida-ne’e autoriza Ministru Justisa atu negósia ho proprietáriu rai sira iha Bebonuk, Díli, ne’ebé aloka ba Projetu Millennium Challenge Account, ho objetivu atu halo konstrusaun infraestrutura ba tratamentu bee, saneamentu no drenajen.

#Média SEI#