Dili, 05-08-2024--Vise Primeiru-Ministru, Ministru Koordenadór Asuntu Sosiais no Ministru Dezenvolvimentu Rurál no Abitasaun Komunitária, Eng. Mariano Assanami Sabino ohin prezide Isar Bandeira ba semana dahuluk fulan Agostu iha Resintu Palásiu Governu, Dili.

Vise Primeiru-Ministru, Ministru Koordenadór Asuntu Sosiais no Ministru Dezenvolvimentu Rurál no Abitasaun Komunitária, Eng. Mariano Assanami Sabino iha nia Diskursu hateten katak Isár Bandeira ida-ne’e hanesan baibain ho objetivu prinsipál mak oinsá estrutura hahú husi Membru Governu, Kargu Diretores Jerál no estrutura tomak iha funsionamentu públiku atu halo kompromisu de onra ba semana dahuluk kada fulan hodi refleta servisu hirak ne’ebé halo ona no saida mak sei presiza atu mellora di’ak liután iha servisu sira iha fulan hirak tuirmai. Isar Bandeira ne’e mós hanesan momentu ida atu ema ida-idak refleta no hatene ninia papél importante sira hodi halo kompromisu hodi didika di’akliu, tanba Bandeira ne’ebé ita hateke ba, Bandeira ne’ebé defende ho mate, ho ran ho tortura oioin husi martires rai ida-ne’e hodi sosa ita-nia Liberdade ne’ebé simboliza liuhusi Bandeira.

“Ita hateke bandeira katak objetivu prinsipál ukun rasik aan la’ós de’it ita iha Bandeira, la’ós de’it iha supra estrutura Estadu nian, Infraesturtura Estadu nian, maibé oinsá ita ida-idak bele didika ita-nia servisu ho di’ak atu bele fó pontualidade ba luta eroi sira nian no livre moris di’ak ba ita-nia inan-aman, ba ita-nia rain, ba ita tomak”, Sua Exelénsia Assanami haktuir.

Seremónia Isar Bandeira Nasionál ne’e partisipa husi Sua Exelénsia Primeiru-Ministru, Sr. Kay Rala Xanana Gusmão, Sua Exelénsia Sekretária ba Igualdade, Sra. Elvina Sousa Carvalho, Sua Exelénsia Sekretária Estadu Komunikasaun Sosiál, Sr. Expedito Dias Ximenes, Kargu Diretores Jerais, Xefe-Gabinete, Diretores Nasionais, Xefe-Departamentu no Funsiunáriu/a sira husi Gabinete PM, Vise Primeiru-Ministru MKAS-MDRAK, Ministru Prezidénsia no Konsellu Ministru, Vise Ministru Asuntu Parlamentares, SEI, SEKOMS, Institutu Defeza no Seguransa (F-FDTL no PNTL), Komisaun Funsaun Públika (KFP), Inspetór Jerál Estadu, AMRT, CNC no seluktan.

#Média SEI#